London(Somaalinet)Sidda aan la wadda socono waxaa dhawaan qarax ismiidaamin ahi ka dhacey Hotel Jazeera oo ku yaalla duleedka garoonka diyaaradaha ee magaalada Muqdisho kaas oo lalla beegsadey Madaxweynaha cusub ee Soomaaliya Mudane Xassan Sheekh Maxamuud wakhti uu kulan ballaadhan kulla jirey wafti uu hoggaaminayo wasiirka arrimaha dibadda ee dalka Kenya Sam Ogeri. Wargeysa Dail Nation ee ka soo baxa magaalada Nairobi ayaa Isniintii daabacey war sheegaya in ay dawlada Kenya qaraxaas ku eedeysey madaxweynihii hore ee Soomaaliya Mudane Sheekh Shariif Sheekh Axmed kadib markii uu wasiirka arrimaha dibadda ee dalka Kenya warbaahinta kulla hadley Nairobi isaga oo faah faahin ka bixinaya weerarkaas ismiidaaminta ahaa ee lagu qaadey Hotel Jazeera oo uu wakhtigaas deganaa madaxweynaha cusub ee Soomaaliya. Haddaba mar uu wargeysku soo xigannayey hadalka wasiirka waxa uu yidhi “Waxaa ila soo xidhiidhay Shariif Sheekh Axmed Madaxeynihii hore waxaa uu ila hadlayay Muddo saacad iyo badh ah intii uu socday ololaha Musharixiinta oo aan la gaadhin Xiligii Doorashada, waxa uu igala hadlayay sidii ay dowlada Kenya ugu Taageeri lahayd in uu mar kale Xilka ku soo laabto laakiin aniga waxaan u sheegay inaanay Kenya Taageero siineyn Musharax gaar ah, kadibna ma wanaagsaneyn Xidhiidhka Madaxweyne Shariif iyo Madaxda kenya, waxaanse la yaabay Maalintii Qaraxu dhacay Markii aan arkay Sheekh Shariif Axmed oo taagan Hotelka uu qaraxu ka dhacay isagoo aan naxsaneyn oo aan u haysanba in ay Wax dhaceen, sidaas darteed waxaan odhan karaa Shariifka ayaa ku lug lahaa amma ka dambeeyey Qaraxyada” Waxa kale oo wargeyska lagu daabacey in wasirku yidhi “Qaraxu waxa uu ahaa mid qorshyesan oo si weyn looga soo shaqeeyey”. Maalin kadibna waxaa magaalada Muqdisho shir jaraa’id ku qabtey madaxweynihii hore ee Soomaaliya Mudane Sheekh Shariif Sheekh Axmed isaga oo iska fogeynaya inuu ku lug lahaa qaraxaas ka dhacey Hotel Jazeera waxa uu yidhi “waxaan ku tilmaami karaa nasiib daro iyo wax aad looga xumaado waxa uu wasiirka arrimaha dibadda ee dalka Kenya ku hadlay waana mid aan ka turjumeyn masuuliyad, waanad ogtihiin xiliga uu wasiirku xilka hayo in ay tahay waqti gaaban oo kooban wax xumaan ah oo mudadaas na dhex marteyna ma jirto sidoo kale dawlada Kenya waxaa ay aheyd mar hadii waqtigii aan masuuliyada hayay ay dhamaatey in wixii na dhex maray meesha ay ka baxdo laakiin waxaa muuqata in colaadi jirto oo ay cuqdadi jirto taasina ma kaalmeeyneyso wada noolaanshaha labada shacab iyo xiriirka labada dawladood ee Somalia iyo Kenya”.
Waxa uu Sheekh Shariif intaa ku daray in uu ogaa Kenya in aysan dhex dhexaad ka aheyn doorashadii dhawaan ka dhacday magaalada Muqdisho taas oo uu la socodsiiyay Wadamo badan oo Caalamka ah isagoona intaa ku daray in aysan jirin kaalmo iyo tagaeero uu Kenya weydiistey si uu Mar kale Madaxweyne u noqdo haddaba mar uu Sheekh Shariif arrimahaas ka hadlayey waxa uu yidhi “Aniga Kenya waxba ma warsan dhaqaalana ma weydiisan sidoo kale cod ma weydiin oo wasiirku cod ma dhiibaneyn, mar uu ila soo hadlayna waxaan u sheegay in ay dhex dhexaad ka noqdaan doorashada, mana jirto cilaaqaad badan oo Wasiirka naga dhaxeeyay oo aan ku wadda hadli karnay maadaama uu waqti kooban xilkaasi hayo”. Sheekh Shariif Sheekh Axmed ayaa sidoo kale ka hadlay hadalkii Wasiirka ee ahaa in uu wax yar kadib yimmid Hotelkii uu Qaraxu ka dhacay waxa uuna sheegay Sheekh Shariif in ay taasi aheyd Masuuliyad isaga saarneyd sidaana uu u tagay goobta waxana qorshihiisu ahaa in uu ka soo kaxeeyo Madaxweyne Xasan Sheekh Maxamuud isaga arrimahaas faah faah ka bixinaya waxa uu yidhi “Dhacdadaasi waxaa ay aheyd dhacdo xun, waxaana meesha u tagay waxaa ay aheyd gurmad iyo in madaxweynaha in aan ka soo saaro meesha sababtuna waxaa ay tahay mar hadii meesha uu shil ka dhaco waxa ugu horeeya ee la qabto waa in madaxda laga soo saaro meesha maadaama aan aaminsanahay in khibradeeda aan lahaa masuuliyadna i saarneydna aheyd in madaxweynaha aan ka soo saaro Hutelka uu degana ee qaraxu ka dhacey sidda aad la wadda socotaana qaraxaas Al Shabaab ayaa sheegatey mana jirto sabab la igu soo leexiyo, waxaana muuqata in wasiirka ay ku jirto colaad fogaatay oo aan macno laheyn waanan canbaareeyneynaa”. Sheekh Shariif ayaa ugu dambeyntii Warbaaihnta goobta joogtey u sheegay in uu hadda wixii dambeeya u dulqaadan doonin in wax laga Sheego uu iska aamuso taas oo uu sheegey in uu marar badan u dulqaatay isla markaana ay sababtey in mar walba wax laga sheego isaga oo arrintaas ka hadlaya waxa uu yidhi “Hadda kadib ma dhici doonto in aan iska aamuso inta wax la iga sheego qofkii wax iga sheega aniguna waan ka dabba hadlayaa wax baanan ka sheegayaa, waxaana dhax dhaxaad noo ah warbaahinta oo noo gar qaadi doonta” ayuu Sheekh Shariif hadalkiisa ku soo gabo gabeyey. Dhanka kale dawlada Kenya ayaa beenisey warka ay baahiyeen warbaahinta adduunka iyo sidoo kale tan Soomaalida kaasi oo ku sahabsan in dawldada Kenya ay qaraxaas ku eedeysey in uu ka dambeeyey Sheekh Shariif Sheekh Axmed, shir jaraa’id oo uu magaalada Nairobi mar labaad ku qabtey wasiirka arrimaha dibadda ee dalka Kenya Sam Ogeri wuxuu kaga hadley wararka ay baahiyeen warbaahintu kaas oo ku sahabsanaa inuu sheegey war ku aadan qaraxii ka dhacey Hotel Jazeera inuu ka dambeeyey Sheekh Shariif Sheekh Axmed. Sam Ogeri wuxuu shirkiisa jaraa’id ku sheegey in marnaba aysan suura gal ka aheyn inuu eedeyn u jeediyo Madaxweynihii hore ee dalka Soomaaliya Mudane Sheekh Shariif Sheekh Axmed isla markaana uu cadeeyey in aanu qaraxaasi isagu ka dambeyn wasiirka oo arrintaas ka hadlaya waxaa uu yidhi “Sidee ayey u suurtoobi kartaa in aan qaraxa ku eedeyno qof masuul ah oo gurmad noogu yimmid isla markaana noo muujiyey dareen naxariis leh oo tilmaamayey in uu ka xun yahay waxa dhacey” Sidoo kale mar uu ka hadley qaabkii uu Sheekh Shariif xilka u wareejiyey waxa uu wasiirku yidhi “Sheekh Shariif waa nin geesi ah oo aan aad ugu faraxsanahay habkii quruxda badneyd ee uu xilka madaxtinimada u wareejiyey”. Inkasta oo hadalka dambe ee ka soo yeedhey Wasiir Sam Ogeri la odhan karo waa tallaabo diblamaasiyadeed oo wadda tashi dambe laga galey hadana dadka aadka u indho indheeya Siyaasada Geeska Afrika waxa ay leeyihiin Madaxweynihii hore ee Soomaaliya Mudane Sheekh Shariif Sheekh Axmed wuu ku deg degay jawaabta uu ka bixiyey eedaas dusha laga saarey waxaaney dadkaasi qabaan in ay arrintani ku habooneyd Sheekh Shariif oo xalkeeda ku baadi gooba mid ka duwan ka uu la tiidsadey shirkiisa jaraa’id. Si kastaba ha ahaatee hadaladaas is burinaya ee ay warbaahinta isku mariyeen Mudane Sheekh Shariif Sheekh Axmed iyo Wasiir Sam Ogeri ayaa ah tallaabo u baahan in ay tusaale wannaagsan kala baxaan madaxda immika ka talisa Somaliland iyo Soomaaliya taasi oo ah in qofka masuulka ah marka wax laga sheego aanu ku deg degin qabashada shir jaraa’id iyo jawaabta arrinta balse uu isku taxalujiyo sidda dhabta ah ee ay ku timmid in wax laga sheego oo waliba lagu baahiyo warbaahinta oo dhan.
Abdirisaq Mohamed Barkhad
Senior Camuudnews
Editor Email: camuudnews@gmail.com
